Kolos - Izak A Coetzee

Kimmings gryp die bondels note en druk dit in die sak. Te stadig. Dan skraap hy die geld en diamante met sy arm in die sloop in. Niks bly oor nie. Die sloop staan bol en groen note peul bo uit. Hy trap dit met sy voet dieper in die sloop vas. 'n Masjiengeweer stotter binne in die huis se sitkamer, dan 'n handgranaat en nog een wat op die dak ontplof. Hy bondel die sloop se bek in sy een hand en sleep-dra die sloop tot by die deur van die studeerkamer. Deur die venster sien hy die helikopter. Dit is helder verlig. Hy moet wegkom. Hy ruk die buitedeur oop en koeëls slaan naby hom teen die muur vas. Iemand skiet uit die enkelkwartiere. Die vlamme van die huis en buitegeboue verlig die helikopter, maar tussen hom en die helikopter lê 'n oop stuk aarde en agter hom is Elim en sy manne met masjiengewere…

Interpol-agent en jagter van dwelmsmouse, Elim de Loorn, kry opdrag om 'n nes van die dwelmbaron, Guthbert Kimmings, in die Lebomboberge te gaan uitwis en Kimmings aan te keer. Maar Kimmings is uitgeslape en Elim kom net-net met sy lewe daarvan af.